Praktika e vizatimit është mjeti përfaqësues më i drejtpërdrejtë, i nevojshëm dhe ndërdisiplinor që arkitekti mund të përdorë. Është mjeti i parë me të cilin studentët e arkitekturës mësojnë të përcjellin idetë e tyre. Është mënyra më private dhe më autoriale që një arkitekt ka për t’u shprehur.
Gjatë historisë së disiplinës arkitekturore, vizatimi ka qenë gjithmonë edhe një kod me të cilin transferohen informacione në kantier, për t’i dhënë trup dhe substancë të ndërtuar koncepteve hapësinore të arkitektit.
Rëndësia e këtij mjeti përfaqësues është sot gjithnjë e më e qartë edhe në aspektin e rëndësisë kulturore dhe historike, kur kuptohet si dëshmi dokumentare e punës së një projektuesi. Në fakt, ka gjithnjë e më shumë institucione private ose publike që janë të përkushtuara ndaj mbledhjes, ruajtjes dhe vlerësimit të dokumenteve të projektit, të autografuara ose jo, veçanërisht në fushën e arkitekturës.
Qëllimi i këtij hulumtimi është të krijojë, me mbështetjen e Universitetit “Zoja e Këshillit të Mirë” në Tiranë (UNIZKM), një hapësirë fizike dhe digjitale, dedikuar mbledhjes, katalogimit, inventarizimit, ruajtjes dhe vlerësimit të një korpusi vizatimesh arkitekturore, me të cilat do të krijohet një strukturë e quajtur: Arkivi i Vizatimeve të Arkitekturës Mesdhetare (ADAM), që do të jetë në gjendje të pranojë kontribute, materiale origjinale dhe fonde arkivore me interes kombëtar dhe ndërkombëtar, lidhur me Kulturat e projektit në zonën e Mesdheut, dhe që potencialisht lidhen me të gjitha disiplinat që kanë të bëjnë me projektimin arkitekturor.
Interesi ndaj ‘bazave të disiplinës arkitekturore dhe të projektit të saj; vëmendja e nevojshme që një program studimi në Arkitekturë duhet t’i kushtojë përfaqësimit, dhe veçanërisht vizatimit, si mjet projektues dhe mënyrë shprehjeje e arkitektëve të ardhshëm; mundësia për të nisur një koleksion materialesh origjinale dhe autoriale që di të tërheqë brenda UNIZKM një trashëgimi me rritje potencialisht të pakufizuar, të materialeve me vlerë dokumentare, historike dhe artistike të lidhura me zonën mesdhetare, janë disa nga arsyet për të cilat ka nisur ky hulumtim, me qëllimin për të krijuar një eksperiencë që, nëse mbështetet me kalimin e kohës, synon të bëhet një referencë në zonën mesdhetare dhe të përballet me realitete të ngjashme, evropiane dhe jo vetëm, që gjithnjë e më shumë po investojnë në fushën e ruajtjes dhe vlerësimit të pasurisë arkivore lidhur me vizatimin arkitekturor.
A.D.A.M merret me kulturën e projektimit arkitektonik dhe urban në zonën e Mesdheut.
A.D.A.M shqyrton format dhe teknikat e vizatimit si mjet të zgjedhur për shprehjen e ideve projektuale, njohëse dhe kërkimore të arkitektit.
A.D.A.M është një hapësirë ku diskutohen kontribute dhe interpretime origjinale në fushat e disiplinave të kompozicionit arkitekturor dhe historisë së arkitekturës, vizatimit, restaurimit, projektimit të peizazhit dhe hapësirave të brendshme, në formën e ligjëratave, seminareve, workshop-eve, botimeve dhe ekspozitave.
A.D.A.M synon të krijojë, me kalimin e kohës, një arkiv me interes ndërkombëtar, i njohur si një hapësirë e përbashkët për kërkimin arkitekturor të kulturave të projektimit që për traditë ose afinitet të zgjedhur njihen në horizontin Mesdhetar.
A.D.A.M është një projekt i hapur për bashkëpunime dhe propozime të jashtme.
A.D.A.M është ideuar nga përgjegjësi shkencor: Simone Barbi (Departamenti i Arkitekturës i Firences dhe Fakulteti i Shkencave të Aplikuara i Universitetit “Zoja e Këshillit të Mirë” në Tiranë).
Grupi i punës përbëhet nga Gianluca Buoncore (PhD UniFi, Qendra për Studimet mbi Arkitekturën Mesdhetare UKZKM) dhe Daniele Vanni (kandidat për PhD UniFi, Qendra për Studimet mbi Arkitekturën Mesdhetare UKZKM).
A.D.A.M është një projekt kërkimor i financuar nga Universiteti “Zoja e Këshillit të Mirë” i Tiranës për vitin 2025.
