Në Kampusin e UKZKM gjendet Kopshti i Të Drejtëve, një hapësirë çlodhëse dhe reflektimi. Me inisiativën e Fondacionit Zoja e Këshillit të Mirë në Shqipëri u ndërtua për herë të parë një kopësht dekorativ që synon të promovojë mes studentëve, punonjësve dhe të ftuarve dimensionin shpirtëror të jetës, qytetarinë aktive dhe ndjeshmërinë ndaj të mirës së përbashkët. Kopshtet e të Drejtëve u krijuan për të nderuar gratë dhe burrat që përballë ngjarjeve të mëdha marrin përgjegjësinë personale për të mbrojtur dinjitetin njerëzor dhe për t’u ardhur në ndihmë viktimave. Kopshtet kanë detyrën t’i paraqesin si shembull opinionit publik ata persona që edhe duke rrezikuar jetën e vet kanë dalë kundër kohës dhe kanë ruajtur vlerat njerëzore përballë ligjeve të padrejta apo indiferencës së shoqërisë. Një I Drejtë vepron sepse dëgjon thirrjen e ndërgjegjes së tij. Kopshti ynë u inaugurua në 20 vjetorin e themelimit të Universitetit ZKM në mars të vitit 2024 dhe ka në hapësirën e tij gurë dekorues nga zona të ndryshme të Shqipërisë, tek të cilët gdhendet emri i të Drejtit.
Gdhendja e emrit tregon forcën shembullore dhe bukurinë e përhershme të dëshmisë së jetës së tyre. Kopshti i të Drejtëve është një hapësirë shpirtërore, takimesh dhe përkujdesjeje ndaj marrëdhënieve njerëzore.“I drejti” i parë emri i të cilit u gdhend në një nga gurët e Kopshtit është emri i Carlo Urbani mjekut që luftoi me sëmundjet infektive. Ai lajmëroi i pari në botë epideminë SARS-CoV-1 (2002-03), u prek vetë nga ky virus dhe vdiq në Bangkok më 29 mars 2003 në moshën 47 vjeçare. Ai tregoi kompetencë dhe përgjegjësi në misionet e tij humanitare pa kufij dhe duke u dedikuar tërësisht në mbrojtje të jetës.
Emri i Të Drejtit të dytë është ai i Ish-Presidentit të Kosovës Ibrahim Rugova që ia përkushtoi aktivitetin e tij zgjidhjes paqësore të të drejtave të popullit të tij. Kopshti i Të Drejtëve u mbështet fuqishëm nga Fondacioni ZKM dhe u projektuar nga arkitektët Alfons Shtjefni dhe
Claudio Radice. Në inaugurimin e këtij Kopshti më 6 Mars 2024 pati shumë pjesëmarrës, ndër të cilët ishin presidenti i Fondacionit ZKM, fr. Ruggero Valentini, rektori i Universitetit prof. Leonardo Palombi, Imzot. Arian Dodaj, Arqipeshkvi i Tiranës dhe nënkryetarja e Bashkisë së Tiranës, ark. Frida Pashako.
